தமிழ் சினிமாவில் பைனான்ஸ் பிரச்சினை, கால்ஷீட் பிரச்சினை என பல்வேறு காரணங்களால் படப்பிடிப்பை அவசரமாகத் தொடங்குவது அல்லது படப்பிடிப்பு தடைபடுவது தமிழ் சினிமாவில் வழக்கமான ஒன்று.
ஆனால் உடல் எடை குறைப்பு, உருவத்தோற்ற மாறுபாடு காரணமாக நடித்துக் கொண்டிருக்கும் படப்பிடிப்பை நிறுத்திவிட்டு, புதிய படமொன்றில் 20 நாட்கள் மட்டும் நடித்து விட்டு, மீண்டும் நிறுத்தி வைக்கப்பட்ட படப்பிடிப்பில் கலந்து கொள்ளவிருக்கிறாராம் நடிகர் சிவகார்த்திகேயன்.
ராஜ்கமல் பிலிம்ஸ் இண்டர்நேஷனல் தயாரிப்பில் ராஜ்குமார் பெரியசாமி இயக்கத்தில் தயாராகும் ‘SK 21’ படத்தில் சிவகார்த்திகேயன் நடித்துக் கொண்டிருக்கிறார்.
அப்படத்தில் அவருக்கு ஜோடியாக சாய்பல்லவி நடிக்கிறார். ஜி.வி.பிரகாஷ் இசையமைக்கிறார். இப்படத்துக்கு அடுத்து ஏ.ஆர்.முருகதாஸ் இயக்கத்தில் நடிக்கவிருக்கிறார் என்று சொல்லப்பட்டது.
இம்மாதம் முதல் அப்படத்தின் படப்பிடிப்பு தொடங்கும் என்றும் சொன்னார்கள். அதற்குள் ராஜ்குமார் பெரியசாமி இயக்கும் படத்தின் படப்பிடிப்பு முழுமையாக முடிவடைந்துவிடும் என்றும் கூறப்பட்டு வந்தது.
ஆனால், அப்படத்தின் படப்பிடிப்பு முழுமையாக முடிவடையவில்லை. இன்னும் 40% படப்பிடிப்பு இருக்கிறது என்று தயாரிப்பு தரப்பில் சொல்லப்படுகிறது.
இந்த நிலையில் நேற்று (பிப்ரவரி 14) ஏ.ஆர்.முருகதாஸ் இயக்கத்தில் சிவகார்த்திகேயன் நடிக்கும் படத்தின் படப்பிடிப்பு தொடங்கப்பட்டதாக, புகைப்படங்களுடன் செய்திகள் வெளியானது.
பூஜையில் ஏ.ஆர்.முருகதாஸ், சிவகார்த்திகேயன், நாயகியாக நடிக்கவிருக்கும் ருக்மணி வசந்த், இசையமைப்பாளர் அனிருத், தயாரிப்பாளர்கள் திருப்பதி பிரசாத், ஆர்.பி.செளத்ரி உள்ளிட்டவர்கள் கலந்துகொண்டார்கள்.
‘SK 23’ என அழைக்கப்படும் இப்படத்தின் முதல்கட்ட படப்பிடிப்பு, இருபது நாட்கள் வரை நடக்கும் என்றும் சொல்லப்படுகிறது.
ராஜ்குமார் பெரியசாமி படத்தை முழுமையாக முடிப்பதற்கு முன்பாக இந்தப்படத்தின் படப்பிடிப்பு தொடங்கியதற்கு காரணம் என்னவென விசாரித்த போது, வந்து விழுந்த தகவல்கள் சுவாரஸ்யமிக்கவை.
ராஜ்கமல் தயாரிக்கும் படத்தில் சிவகார்த்திகேயன் இராணுவ அதிகாரியாக நடிக்கிறார். அதற்கு முன்னதாக அவருடைய கல்லூரிப்பருவம் மற்றும் இராணுவப் பயிற்சிக்காலம் ஆகியனவற்றைப் படமாக்க வேண்டியிருக்கிறதாம்.
அதற்கு இப்போது இருக்கும் தோற்றத்தைக் காட்டிலும் கொஞ்சம் ஒல்லியாக இருக்கவேண்டும். அதற்காக சிவகார்த்திகேயன் உடல் எடையைக் குறைக்க வேண்டும். ஏ.ஆர்.முருகதாஸ் இயக்கும் படத்துக்கு இப்போது இருக்கிற மாதிரி தாடி, மீசையுடன் இருக்க வேண்டும்.
அதனால் ஏ.ஆர்.முருகதாஸ் இயக்கும் படப்பிடிப்பில் கலந்து கொள்கிறார். முதல்கட்டப் படப்பிடிப்பு முடிந்தவுடன் உடல் எடையைக் குறைத்து தாடி, மீசையை எடுத்துவிட்டு ராஜ்குமார் பெரியசாமி இயக்கும் படத்தின் படப்பிடிப்பில் கலந்து கொள்கிறார் சிவகார்த்திகேயன்.
இதற்காகத் தான் ராஜ்குமார் பெரியசாமியின் படப்பிடிப்பை தற்போது நிறுத்தி வைத்து விட்டு, ஏ.ஆர்.முருகதாஸ் படத்தில் சிவகார்த்திகேயன் இணைந்திருக்கிறார் என்பது குறிப்பிடத்தக்கது.
